arogansia di hende
nò
arogansia di mi parti
di sinti pena
pa galiña gai i puitu
pushi i kachó ku a sigui
bin rancha den mi logá
sin buska skondementu
ineksperensia na promé bista
falta di bon instinto
ku tòg a laga nan na kaya
mirando proyekshonnan digital
tur na koló
tur sigur
di mateo su pasonan
kaba ta mi no a komprondé
nan sabiduria
ku ni bientu ni awa lo no a bin
promé instrukshon
asombro di mi parti
di realsisá kon limpi
mi falta di ta
pa por topa maestro grandi
ku kloaka tapá
i protoproyektil den mi kurá
ku por kousa daño
na mi i na otro bida
di dos instrukshon
anto mi inspekshon di kurá
tur hidratá
tera papa papa
despé di un nada di áwaseru
ta fiha mi bista riba
mata bèrdè diki
ta buska pa tochi shelu
i ta mi bista numa
a gròwatá
den mi memoria
pa formulá
un reflekshon nobo
un pregunta
ku lo mi no a hasi
si no tabata
pa e spoki di mateo
e formulashon di si mi
ta sigui stima
bara di lechi i beyísima
meskos
awor ku nan a
ranka lihé
choka
mi karawara
datu
palma
flor di glas
kachu di biná
koron’e labirgui
wayaká
te ora mi a bin kita e
mi
dilanti di karawara
i pon’é bèk den mente di e poeta
ku mi a bin reis riba
e instrukshon prinsipal
ku amor
ku no pasa
den maske ta
miedu di mal tempu
no a demostrá
su firmesa
anto mateo a sigui krese
kibra mi kurason
kada bes mi pensa
riba esnan
riba su kaminda